慢煮屋 (已搬遷) 新店位置

今日同 P san 嚟到觀塘行吓倉, 行完就揀咗喱間小店幫襯。指定動作後, 入到去一眼見晒, 裝修亦簡單, 枱櫈係類似日本咁的的骰骰。 安排入座後, 要填柯打紙再由客人到櫃檯落柯打同付款, 之後餐就會由店員送到客人面前。我哋點咗兩個主食, 喱個係慢煮牛腹扒蕎麥冷麵, 牛肉軟腍, 好嫩, 而且有淡淡牛肉香味, 咬落好 juicy, 配埋個汁, 唔會蓋過牛肉味, 不愧係慢煮, 而且份量亦唔算少。    再嚟就係日式銀鱈魚西京燒蕎麥冷麵, 銀鱈魚好香魚味同好滑, 配埋有少少甜嘅汁, 再配有爽脆翠玉瓜同紅蘿蔔, 感覺好平衡。兩個蕎麥麵都用竹葉同藤蓆墊底, 會配有薑蓉同 wasabi, 用薑蓉放落冷麵汁入面, 再將蕎麥麵放入然後夾起嚟食, 感覺好清新。 不過店入面略嫌有啲迫, 女仕帶住袋可能會坐得無咁舒服, 不過 CP 值不錯哦。