兄弟幫食堂 (已結業)

日式放題就食得多，串燒放題食過未？平時同朋友兩個人去食串燒閑閑哋都五六百蚊賣單，香港竟然有任食串燒！當然要去試吓啦。環境位於上海街，朗豪坊後面，地理位置都唔難找，餐廳屬小店，但座位都坐得舒適。餐牌我哋食Plan a，90分鐘任食串燒、和牛、海鮮、小食 $268+10%。串燒類差唔多每款都有試，當中燒魷魚鬚串、燒雞泡魚干、燒阿根廷紅蝦火炙叉燒、燒雞腎、燒靖魚柳都係我心水之選。燒雞泡魚干係我個人喜愛，上枱熱辣辣，口感鬆軟又不缺煙韌，仲要味道好甜，我好中意。另外，我自己本身好鍾意煙肉荔枝嘅配搭，荔枝嘅清甜可以中和煙肉嘅油膩，兩者配搭恰到好處。火炙叉燒屬日式拉麵果款，薄得嚟唔韌，燒靖魚柳係原條上咁制，份量好多，鍾意佢無乜骨之餘，肉質嫩口。海鮮類Plan a嘅選擇相對上較少，但我鍾意食嘅都有，燒阿根廷紅蝦、燒蠔、燒扇貝。阿根廷紅蝦好大隻，火候十足、燒蠔可以揀蒜蓉味或者芝士味，兩款都試齊晒，美中不足係有少少沙，燒扇貝正常。蔬菜類原條茄子、燒菠蘿、燒韮菜、燒娃娃菜、燒虎皮尖椒、冬菇串。原條茄子可選川燒/和式，有時自己食放題都會嗌燒韭菜，但係次次都唔識燒，呢度燒埋上枱就有得食，燒虎皮尖椒都會有少少辣度