Makuma (已結業)

今日同男朋友去荔枝角買完寵物嘢就順便食埋個晚飯，唔想行咁遠就揀咗D2 one 樓下嘅依間日式cafe。香煎大蝦明太子意大利麵，個菜名望落好西式，佢就加咗啲紫菜碎喺面頭，成碟意粉既刻變日式洋食，大蝦都煎得幾香，意粉掛汁，啖啖都沾滿明太子忌廉，幾好食，賣相同擺盤都好靚，色香味俱全。男朋友叫咗灸燒慢煮24小時日式叉燒 •月見冷烏冬，叉燒有三塊，size大約都有我手掌心咁大，同埋都幾厚切，食落好淋同入味，相信真係慢煮出嚟。今次我哋都冇叫嘢飲，就係為咗留肚食甜品，朱古力窩夫・麻糬・黒糖蒟蒻・海鹽焦糖醬。估唔到有4塊窩夫，食落外脆內軟，最鍾意就係個麻糬，超煙韌，佢整到好似一張被冚喺窩夫上面，打卡一流。唯一覺得美中不足係冇雪糕，我諗加埋雪糕成件事會好開心。餐廳環境裝修幾靚，座位都幾舒服，加埋餐廳播嘅音樂整件事好似去咗日本居酒屋咁，氣氛幾好，我諗我會帶朋友下次都會再嚟多次。