Cherry Tokyo Cafe (將軍澳中心) (已結業)

今日又試下新餐廳，將軍澳中心既新餐廳有排試。今日就試左呢間食日本同西式野既Cherry。其實價錢就真係同一般餐廳都差唔多，每道菜都$6x-$8x，但間餐廳就開正喺商場既中間，會不斷俾行過既人望住你食，講真真係會食得無咁自在。menu上面既選擇都好多，經過一輪討論，我地叫左黑松露忌廉意粉，蟹籽青瓜沙律，牛油果軟殻蟹反卷，明太子雞翼，一杯焦糖燉蛋泡沫咖啡同宇治抹茶鮮奶。沙律都真係同一般既無分別，$48份量真係好少。呢個反卷個味道唔錯，軟殻蟹仲係好脆，但個反卷一夾就散哂，包得好唔實，食到天一半地一半。雞翼外面炸到金黃色，熱辣辣，入面釀左啲明太子，隻隻都脹卜卜。意粉聞落就好香，但食落我就覺得個汁唔夠滑身，好似仲有啲粉既感覺。我嗰杯creme brûlée cappuccino 好香濃既咖啡味，飲落有甜甜既焦糖味，可以入黎飲杯咖啡都唔錯。得閒試下新野，都係幾開心既，下次就想試下甜品多啲。