鮨政 (已結業)

行完山拖住疲倦嘅雙腿，應承肥髀一齊去食日本菜，呢間門面好四正，一貫日本人餐廳！7點去到，場內已9成滿，店員好有禮問有無訂位，因為無訂位，佢望一望排板，話晚上8點交枱就得，坐在最近門口二人枱，枱與枱之間唔迫，淺木傢俬，白紙燈籠燈罩！光猛乾淨！因為我已食下午茶，唔太肚餓，所以各自揀啲喜歡嘅食物，食物好快到！飛魚子軍艦（$20）飛魚子卜卜脆！紫菜好脆！拌埋子薑好味！香蔥吞拿魚細卷（$40）吞拿魚肥美香滑，配埋紫茶香蔥香口唔膩！蟹籽沙律（$45）夠凍（連碟都凍），蟹籽卜卜脆，蟹柳絲唔假，沙律醬唔會太多，唔會浸晒啲材料，沙律菜爽脆！三文魚親子丼($98)餐具木砵好靚，三文魚厚身肥美，三文魚子脹卜卜，好飽滿，白飯上有紫菜絲，增加白飯香味！子薑鮮嫩！好味！波子汽水（$20）夠氣好味！主要係為粒波子！麵豉湯:夠熱，多蔥香口，海帶滑溜！唔會太鹹！食物好味，擺盤靚！明顯係日本人主理，店內亦有日本人客人，所以其中幾個店員都識講日本話！雖然爆場但唔嘈雜，店員有禮，我坐低之後，帶我入座嘅店員更正話唔使急交枱了，上菜收碟都會問候一聲！食得好舒心嘅一餐！