金子半之助 (奧海城二期)

營業中

休息中

去奧海城買完嘢，嚟金子半之助晚餐。一坐低就有杯黑豆茶，成個壺擺低自己隨便加，啱晒鍾意飲茶嘅我。餐牌不時有期間限定或者推廣優惠。今次叫咗江戶前天丼，加$38將海老升級做大隻啲嘅車海老，其他材料有穴子、小魷魚天婦羅餅、溫泉蛋、海苔同莢豌豆。原本主角係穴子，即是星鰻，比一般鰻魚冇咁肥、肉質較纖細。升級咗嘅車海老，有些少喧賓奪主，size夠大，味道又比穴子突出，肉質爽口；今次一次過試食晒兩種口味，開心。其他食材處理得宜，舖上天婦羅粉經胡麻油炸後變得香脆，而又不失新鮮原味。另外叫咗軟殼蟹迷你天丼加溫稻庭烏冬。軟殼蟹味道鮮甜濃郁，烏冬夠滑溜，湯底又好味。木魚、蔥花、天婦羅粉、海藻等配料放喺木盒自己加，隨心之餘，又有儀式感。兩個set都有跟前菜，而佢嘅古早秘傳天婦羅醬汁分開另上，可以按個人喜好用多用少，又唔會浸淋啲天婦羅。而丼碗個底係空心嘅，係日本嘅傳統工藝，可以更好保持食物嘅溫度，邊食邊傾偈，食物都冇咁快凍。簡簡單單一餐，店員都幾有禮貌，價錢唔算平，但整體體驗唔錯。