日暮家 麵匠 (已結業)

選址尖沙咀大型商場後面一條小巷，周圍都有唔少食肆同零售鋪頭，但好多都執晒，好可惜，唯獨呢間拉麵店裝潢新穎，燈火光明，店外有隻神獸坐鎮，看守住間鋪頭，俾人一種朝氣蓬勃嘅感覺！當晚去已經距離開幕一個月左右，估唔到6點零去到都要排隊，期間有人招待你點餐、掃安心出行，仲提點你人齊入座、限時食45分鐘，過程好順利，等咗唔夠半個鐘就入座！一黎就點咗個「日暮拉麵」，由最原始嘅口味試試佢！湯底我揀咗少油、清淡湯底，見到廚師即場根據客人口味去調製個湯底，比我想像中易入口。麵身就揀咗硬少少，希望保守個彈牙口感都做到。而比我最大嘅驚喜係慢煮豚肉叉燒，完全無外面食過好煙韌、咬唔開、好乾身嘅質感，佢係肉身好軟，一咬就散開，化入人中嘅質感，配埋少少黑椒，好入味！額外再加咗隻溏心蛋，用日本夢王蛋做嘅，蛋黃金橙色，蛋味超濃郁，一定要加配！另外再加咗個「明太子醬天婦羅無骨雞翼」，炸得好脆好啱味，雞肉又好滑嫰，配埋明太子醬同少少沙津醬，簡直超夾！