影片
更多
2019-04-07
166 瀏覽
前幾日生日，朋友一直神神祕祕話要俾個驚喜唔講食咩，原來係食omakase! 「OMAKASE」指廚師發辦，由廚師挑選最優質、最時令嘅食材，再創作唔同嘅料理，所以基本上每次都會有唔同嘅菜色，可謂日本料理嘅「最高境界」！雖然一向鍾意食日本菜，但omakase真係第一次食～ itadakimasu啦 😍鱻88位於佐敦道嘅舊街之中，門面由淡木砌成一條小路，十分有日本小町嘅感覺。一上樓梯，右邊就係吧枱，可以望住師傅創作嘅過程；當然除咗吧枱，餐廳仲有卡位同埋包廂，啱晒一班朋友嚟食飯吹水。專程嚟食omakase嘅我地，當然要坐吧枱啦！鱻88嘅omakase有兩款set可以揀，一款$888一款$1288，而我哋就揀咗$888嘅套餐試試。決定好套餐後，師傅馬上問我地有無咩係唔食，再為我哋設計omakase嘅菜色，十分細心呢！今晚嘅前菜係青柳貝、冰頭漬（三文魚頭軟骨）同埋鮟鱇魚肝。師傅向我哋講解，omakase會按味道淺味至濃味嘅方式上菜，先可以享受到食材嘅鮮味。果然！前菜味道清新醒胃，冰頭漬軟得嚟爽脆，帶少許檸檬味；青柳貝亦有別於平日食開嘅貝類，比較軟身但帶淡淡海水味；最特別就係鮟鱇魚肝，睇起來晶凝通透
前幾日生日，朋友一直神神祕祕話要俾個驚喜唔講食咩，原來係食omakase!
「OMAKASE」指廚師發辦，由廚師挑選最優質、最時令嘅食材，再創作唔同嘅料理，所以基本上每次都會有唔同嘅菜色，可謂日本料理嘅「最高境界」！雖然一向鍾意食日本菜，但omakase真係第一次食～ itadakimasu啦 😍
鱻88位於佐敦道嘅舊街之中，門面由淡木砌成一條小路，十分有日本小町嘅感覺。一上樓梯，右邊就係吧枱，可以望住師傅創作嘅過程；當然除咗吧枱，餐廳仲有卡位同埋包廂，啱晒一班朋友嚟食飯吹水。
專程嚟食omakase嘅我地，當然要坐吧枱啦！
鱻88嘅omakase有兩款set可以揀，一款$888一款$1288，而我哋就揀咗$888嘅套餐試試。
決定好套餐後，師傅馬上問我地有無咩係唔食，再為我哋設計omakase嘅菜色，十分細心呢！
今晚嘅前菜係青柳貝、冰頭漬（三文魚頭軟骨）同埋鮟鱇魚肝。師傅向我哋講解，omakase會按味道淺味至濃味嘅方式上菜，先可以享受到食材嘅鮮味。果然！前菜味道清新醒胃，冰頭漬軟得嚟爽脆，帶少許檸檬味；青柳貝亦有別於平日食開嘅貝類，比較軟身但帶淡淡海水味；最特別就係鮟鱇魚肝，睇起來晶凝通透，入口瞬間就融化喺舌尖，仲要完全無魚類內臟嘅腥味！連一向怕腥嘅朋友都對佢讚口不絕🤣 題外話，我哋第一次聽鮟鱇魚就上網search一下，發現原來就係深海嘅燈籠魚😳❗難怪咁特別～
上完前菜之後就到刺身啦！同前菜唔同，師傅話刺身係會一樣一樣咁上，食完放番個碟上前，佢先會再俾下一道菜我哋～
第一道刺身係活赤貝。師傅將赤貝切成條狀，刀功功架十足；活赤貝帶橙紅色，不但新鮮，口感仲爽脆中柔軟 。
第二道刺身名叫「羽太」，師傅話姐係石斑薄切，而羽太係石斑嘅日文，真係唔講唔知😂
而其中一塊羽太刺身包著芽蔥，師傅話一齊食除左可以為刺身增添清新香味，芽蔥嘅微辛辣感仲可以刺激食慾！
第三道刺身係火炙鰤魚魚腩。魚腩嘅脂肪多到入口即溶，超級肥美！上層加咗少辛辣醬，果然係愈食愈濃味呀🤣配上火灸嘅炭火味又係另一種層次～
刺身後就到比較濃味嘅燒物 — 炙燒一口牛。
本身我同朋友都有啲怕牛騷味同血水，但呢道菜完全無🥰 火喉掌控得不溫不熱，雖然軟熟彈牙，但又唔係三成熟個種血淋淋嘅口感（笑）。碟中仲放咗野菌同小玉米，中和一下濃味嘅牛柳粒。
燒物後就到炸物啦。今日嘅炸物係活海鰻天婦羅😍 我同朋友兩個都係鰻魚愛好者，一上菜就急不及待放入口。我哋以為天婦羅係少肉厚炸粉，但呢個係完全相反嘅😂鰻魚厚到食唔出有炸粉，而且雖然肉厚，但居然無骨！好奇寶寶如我哋，就問師傅點解海鰻會咁厚肉啦😹然後師傅話，出面好多自稱海鰻其實係穴子，肉比較薄同少，係第二種鰻魚嚟；海鰻就會比較厚肉多汁，食落口感層次比較豐富，大家以後唔好搞錯啦（笑）。師傅仲話佢哋呢度係自己養鰻魚，每朝去揀新鮮嘅活鰻，再買番嚟自己處理。因為由揀魚、劏魚、去骨到上菜都全部由師傅負責，動輒大半日，所以好少餐廳會咁做lu。
食完炸物就到壽司時間～ 師傅話上菜方式同刺身一樣，都係一件食完再一件咁上菜，俾足夠嘅時間你回味每一口（笑）。
首先登場嘅係金目鯛。本來我食壽司鍾意一半一半咁食，可以食耐啲嘛🤣但師傅話品嚐壽司係要一口食晒佢㗎！所以我哋一啖食咗件金目鯛，果然無錯，整件食先真正品嘗到魚嘅清淡鮮甜！
第二件係白蝦肉壽司，蝦肉上放咗少許蝦子，蝦肉鮮甜再以蝦子吊味，一清一濃配合得十分美妙。
第三件係火炙愛女魚。配上魚身嘅黑松露，更能為愛女魚本身淡淡嘅牛奶香提味。
第四件係赤身壽司。師傅用咗紫蘇葉同七味粉調味，令味道層次更加分明，但又唔會完全蓋過赤身嘅鮮甜。
第五件係太刀魚腩。師傅直接喺魚腩上磨海鹽後炙燒，令味道苦得黎帶甘，而且入口即溶。
第六同第七件分別係三文魚籽同北海道馬糞海膽。兩者都鮮味十足，三文魚籽粒粒分別；而馬糞海膽色澤金黃，顆粒明顯仲好滑溜！
最後就係大小拖羅壽司。師傅係拖羅上再放上小拖羅油脂，令整體帶兩層口感；放入口居然有洋蔥味，洋蔥刺身相配意外地帶到魚嘅鮮味出黎，真係好鍾意呢個組合！
壽司過後就到卷物。師傅為我哋創作咗碎吞拿魚蟹肉卷，三件卷物分別配上唔同topping，分別係：柚子辣醬、黑松露同埋蒜頭。雖然用料一樣，但配唔同topping帶出嚟嘅味道又好大分別，可謂一次過滿足三個願望😹
食過卷物，隨即就上湯品啦！今晚嘅湯係豆乳昆布湯，湯底以魚湯再加豆乳製成，十分鮮甜。
最後就到甜品 — 傳統嘅紅豆抺茶蒛餅😍蒛餅配上濃濃嘅抺茶粉，帶些少茶澀，配上甜甜嘅紅豆蓉，完美！
張貼
