麵道 (已結業)

拉麵店越開越多, 連荃灣呢個小區都唔例外. 放假行商場見呢間新開, 幾多人WO, 唔執輸又試下先.义燒溏心蛋龍蝦豚骨湯拉麵, MENU寫湯底由龍蝦頭, 蝦殼, 蝦籽熬成, 再加入豚骨湯, 先飲一啖, 好濃郁既蝦鮮味, 有D似龍蝦湯, 豚骨味較少 , 但仍有豚骨既黏口感, 而且帶少少辣味.拉麵可自由選擇軟硬度, 揀左適中, 食落口感好彈牙爽口, 食到尾都唔覺拉麵浸腍晒. 义燒稍為煎過, 特別香. 脂肪同肉既比例各半, 口感軟腍入味, 但唔覺肥膩, 义燒亦唔會太薄.煎餃子, 食拉麵既絕配, 煎到隻隻金黃色, 但唔油膩, 皮夠薄, 網紋脆卜卜, 餡料又夠豐富.特色綠茶可樂, 淡淡既綠茶味, 似梳打水既有汽飲品, 幾清新.整體食物質素很好, 服務員各位都好有禮貌, 環境好舒服乾淨, 下次會再黎食下雞白湯底.