隠家拉麵工場 (已結業)

好早就發現呢間隱世貴價拉麵店，尋晚終於黎撐檯腳一試！第一次食沾麵，呢間店得三種麵兩種蛋同幾種配料，兩個人叫左一黑一白，無意中聽到店家講原來兩種面落嘅油係唔同的，又學到野！沾麵出名湯汁濃而重口，為掛湯而特製。呢碗香料好多，湯汁濃而鹹，味道香而不膩，但掛湯效果就一般。值得一提嘅係兩種蛋，特色半熟煮蛋只有三四成熟，加入醬油柚子味道奇特，個人覺得一d都唔夾，因此兩三啖就已放棄。反而係濃湯入面嘅溫泉蛋熟得岩岩好，溏心黏稠，最重要係吸收左濃湯嘅鮮香，抵讚！最後不得不提嘅係呢度嘅叉燒，門口標榜非巴西黑心肉，肉質厚度肥瘦適中，外圈炙燒微焦，同醬汁嘅味道特別夾，非常入味，別具匠心！總括而言食物味道無驚喜而偏貴，但用料同態度可見用心。其實黎呢度就係食氣氛嘅，睇食評以爲好狹窄侷促，但個人覺得好有日本街頭風，大廚同店主都係鍾意同客人傾計嘅日本人，收碗碟個陣講日文，鍾意日本文化嘅應該會同我一樣覺得氣氛好正，值得一試。