早安越南 (已結業)

原來坐地鐵入黃埔係好方便嘅，黃埔住宅多，自然野食都多，今日就去會左一會呢間早安越南嘅晚餐。一入去就覺得好特別，一D都無越南餐廳嘅感覺，因為鋪面唔係用一貫越南餐廳嘅綠色白色風扇咁，而係好似落左酒吧嘅感覺，深色裝修，紅色霓虹燈，好cyber ，但光線充足嘅，唔會係黑到睇唔到。嗌野食啦，一縱越南美食都有得揀，我地就order左蝦多士、蒜蓉炒貴妃苗、牛柳粒紅飯、串燒撈檬。蝦多士係最快上枱嘅，落單後大概十幾分鐘就上枱啦，係用法包上面鋪左d蝦肉然後炸嘅，好脆口，不過係蝦嘅味道少左D同油膩左少少，應該係麵包sok油。牛柳粒紅飯上枱係好香嘅，牛柳粒係正嘅，炒得好好味，少少敗筆係個紅飯味道稍淡，獨立食麻麻，要配埋牛粒一齊食先夾啦。炒貴妃苗我自己就會覺得炒得好香，蒜味十足，不過偏鹹嘅，配左岩岩嘅紅飯就ok啦。反而最正係份串燒撈檬，係最耐嘅，店員解釋係串燒要即燒所以花時間。今日係order曬牛豬雞三款，牛同豬我食到有香茅醃果勁香，食落勁野味，肉汁鎖曬起入面，個雞就配埋個燒烤汁就perfect。個檬粉呢係好fresh，有抵消串燒嘅功效，而個檬粉汁我自己會比出面嘅辣同酸，反而唔係好甜，唔食得辣嘅就唔好落咁多啦。