美新茶餐廳 (已結業)

早幾晚師傅好夜先喺監房走, 餓到半死於是就決定再黎呢間食店, 貪佢d野食幾好味同埋咁夜都仲有好多野食可以揀!一入到去伙計就叫師傅試下個晚餐, 由於個晚餐晚晚都一樣, 加上師傅之前都試左兩款, 所以就決定轉一轉口味; 睇左一陣就柯打左個咖哩牛肉飯, 而柯打飲品可以再用半價, 咁師傅就要左凍咖啡!話都冇咁快有個餐湯擺左喺師傅面前, 師傅再望一望原來咖哩飯係有湯送, 而今次係蕃茄薯仔湯, 味道清清甜甜, 冇味精都幾好味; 跟住個咖哩就到, 咖哩唔係即叫即整而係整定, 不過咖哩都幾香, 係個汁就杰少少, 至於辣味就一般啦, 而牛肉就好鬆, 但肉地唔多靚, 而薯仔好腍好入味, 都幾正; 至於白飯就勁多, 不過可惜就幾硬, 唔知係咪太夜嘅關係呢, 所以d白飯都雪左入雪櫃呢? 而凍咖啡就幾香幾好味, 飲完之後個口唔會有酸嘅感覺, 得喎!總括黎講食物質素還是可以, 環境真係普通, 而服務亦可, 而價錢就相當抵食, 咖哩牛肉飯三十三蚊送餐湯, 飲咖啡半價, 七蚊雞, 埋單四十, 抵食! 做得咁辛苦都係為左食餐好, 如果下次早少少黎, 相信個水準會更高, 今次嘅咖哩一般啦, 所以比唔到笑臉, 但一定會再黎