發哥粥底海鮮火鍋 (已結業)

係觀塘工業區收工，想搵下有咩食，原來平時下午嘅360冰室夜晚搖身一變變左發哥粥底海鮮火鍋，因為平時返工食lunch都有食過360冰室，性價比都唔錯冇諗到原來夜晚係粥底火鍋！抱着好奇嘅心所以就試一試，一入門口就有兩碟開胃小菜，另外仲有四隻泰式青口，好入味。值得一讚嘅係自家製竹蓆茅根，好清甜。我地兩個人都飲左兩渣！當然都有每間火鍋店有嘅汽水，個人都係推薦竹蓆茅根！ 另外仲要講下佢有足料燉湯，一碗咁細碗嘅湯竟然有幾舊螺頭，我都未食過火鍋店有埋燉湯送！不錯！我地試左龍蝦餐，原來仲有包新鮮鮑魚，聖子，安格斯牛肉，蜆肉，多寶魚等等。另外仲可以揀八款配菜！首先講左重點海鮮先，佢隻龍蝦真係好多膏，爆曬出黎，仲要厚肉！另外鮑魚聖子好新鮮，我食嘅所有海鮮，貝類都完全冇沙，貝類都大大隻，咁既價錢出邊都未必買到咁新鮮，仲要已經洗乾淨晒俾你。跟住可以講下佢送嘅8樣配料，個人最鍾意嘅係自家製墨魚滑同蝦滑，試過出邊食好多火鍋店都唔係自家製，所以覺得呢間都好有誠意，2個都好好咬口，墨魚同蝦嘅味都好出。值得一讚！講到明粥底火鍋，最後當然係有粥底，海鮮嘅汁已經跌晒係個湯底度，員工會拎南瓜粒等配菜去煮粥，個人建議煲耐啲好食