茶木‧台式休閒餐廳 (MegaBox) (已結業)

晏晝同老婆去Megabox，睇完戲溜完冰，個肚打晒鼓，就拿拿臨揀左茶木食晚飯。以前出名要等位既茶木，分店越開越多，亦開始冇以前咁需要等咁耐位。今次六點未夠就黎到，下午茶時段啱啱完結，當然唔駛等位。兩個人叫左紅燒牛肉麵、沙茶牛肉炒手作麵、酥炸蚵嗲同一杯珍珠奶茶。首先上枱既係沙茶牛肉炒作麵，完全係乾炒牛河既概念，味道唔差，只係有啲牛肉炒得有啲韌。Well，喺台灣餐廳都係叫返台式食物吧。紅燒牛肉麵，牛肉幾淋，麵質亦幾彈牙，不過湯底就始終唔夠台灣地道咁濃味喇，原本叫左走葱最後都係冇走到，有啲唔上心喎。個人最喜愛既炸蠔餅，即係今次叫既酥炸蚵嗲，有啲失望，因為實在太多炸粉太少蚵仔。凍珍珠奶茶叫左少甜走冰，呢次就真係做齊喇。唔夠飽，叫多個甜品，紅豆抹茶蜜糖磚塊，說穿了即係紅豆抹茶雪糕厚多士，抹茶雪糕冇乜抹茶味，多士就搽滿左蜜糖，加埋紅豆一齊食啱啱好。食完飯出黎，已經見到門口出現人龍等位。似乎茶木仲係幾受歡迎既。