翠華餐廳 (黃大仙中心北館) (已結業)

今日放假，所以同屋企人黎咗翠華食早餐。一共嗌左兩個早餐，份量夠多又好食。首先係早餐A，仿鮑魚火腿絲湯通粉加煎雙蛋同牛油餐包。個人黎講真係好鍾意佢呢一個早餐，啲鮑魚絲同火腿絲雖然睇落唔係話好多，但係同佢啲通粉嘅比例非常好。佢嘅煎太陽蛋賣相好靚，個蛋黃唔會太熟，係煎得岩岩好嘅太陽蛋。另外仲嗌咗個歐陸早餐，有吉列魚柳同埋炒蛋，配茄汁豆同牛油豬仔。佢嘅吉列魚柳真係好厚好大塊，差啲食唔哂。炒蛋大份得來又夠滑。牛油豬仔就更加唔使講啦，脆卜卜咁夾埋啲煉奶真係好香。呢間翠華分店同地鐵站好近，裝修又舒服，如果大家經過都不妨試吓啦。