大伙頭 (已結業)

呢間餐廳嘅早餐，我食過不下30次，一直以來都覺得佢嘅份量係特別大份，味道唔錯，大玻璃亦都容易睇車。鍾意食佢嘅薑絲牛肉麵，歐陸早餐同埋雞扒/豬扒丁麵餐。 早排門口頻密抄牌，中過招之後，少去咗。今日重臨舊地，叫咗一個歐陸早餐，豬扒，蔥花炒蛋，煎太陽蛋，同埋煙肉。豬扒好明顯比以前細件咗好多，以前塊豬扒好似塊面咁大，而且又厚，依家就係普通一塊薄豬扒，仲分開咗一半，半塊半塊咁就好似啲頭頭尾尾搭埋。炒蛋煎蛋煙肉就正常。多士佢有三種選擇，可以揀白麵包，麥包，或者甜麵包，多士都唔使加錢。佢以前嘅麥包多士好好食，自從轉左黑糖麥包之後，就好少食，因為唔係麥包嘅感覺，似係一塊黑色嘅白麵包，冇麥包嘅咬口同顆粒，一啲都唔好食。 所以揀咗白麵包。跟熱飲，承惠$46 $46 一份早餐，冇咗大大塊嘅豬扒，同埋好好味嘅麥包多士，去其他餐廳都有大把選擇。不過佢係長期都好多人食早餐，朝頭早食個早餐都係要等位嘅，咁當然有值得惠顧嘅地方。我諗門口停到車係一個好大嘅原因。希望佢嘅食物可以進步返！