火鳳凰火鍋料理 (已結業)

突如期來的颱風假，搞到要屈左係屋企食兩日野，一有機會出番去就食盡d。在份量上其中一個選擇就係打邊爐。餐廳係旺角旺中帶靜的地方，坐位就專門為打邊爐而設咁，比較闊落。兩個人黎食都想盡量cover多D種類。湯底方面揀左個好有書卷氣的名 —雪山飛狐鍋，送到上黎果時又真係幾有畫面—一舊又一舊的蛋白好似一片片飛雪咁散落係海斑煲成的魚湯上面。一啖魚湯配一舊蛋白咁飲，味道鮮甜得黎又幾得意，係正式開始邊爐之前都飲左三四碗。煲入面的海斑都有一大條，稍為煎過再後加入湯，口感不俗。舖頭主打幾個必食套餐，小弟鐘意食牛就少不免揀左至尊牛魔王。擺盤係一隻金牛造型的盤，大份之餘夠哂霸氣，上面鋪左三款唔同的牛—美國封門柳、安格斯牛肩胛同頂級牛板腱。兩個人食呢度大概有三至四人份量的牛拼盤有d多，但味道就真係一流。最深刻就係牛板腱，因為平時少機會有得食，呢度的牛板腱淥一淥少少爽口，牛味十足。 另外都點左廣島蠔同細鮑魚等配菜，配料新鮮且價格相宜，食完都真係捧住個肚落樓，滿載而歸。