宏發燒臘飯店 (已結業)

今日接個好朋友收工，跟住行街食飯直落。朋友係sogo返工，我早左少少到，所以求其搵間野食住等佢！比我見到呢間燒臘店好多人排隊買外賣，而店內又有位，我就入左去試試。店內環境唔大，不過座位唔逼，都坐得幾舒服。我發現店內9成都係遊客，有外國人，亦有內地人等。當時全店好似得我一個本地人 哈哈。我點左個好耐無食既燻蹄切雞飯。因為唔係度度都有得食燻蹄，所以見到即刻心心眼，一定要叫！！正！有例湯送~~花生眉豆煲雞腳。無味精老火湯，好香花生味，雞腳又煲到稔哂，好好味呀~~~呢度既燻蹄皮肉均勻，好爽口，配埋白醋真係超級好味！仲要好耐無食，更覺欣賞。切雞肥美嫩滑，讚！仲要一提既係佢既薑蓉，調得好好味，唔會太油太咸，好味~唔怪得之咁多人排隊買外賣，唔怪得之咁多遊客冒名而來，係有水準之作！絕對唔失禮呀。估唔到今日意外地搵到正野食☺開心 滿足。