美味故事 (已結業)

想揾間靜靜地既餐廳食個飯，係網上睇到呢間餐廳既環境好似唔錯於是就黎左食飯。當日平日而且比較夜先上去所以唔算好多客人，幾符合我地想要既餐廳環境。呢間餐廳用電子化點餐，係手機點完餐之後好快就上菜。因為太肚餓所以影左前菜就無影到其他。餐湯方面有兩個選擇，今次揀左蘑菇濃湯，個湯同出面飲既好唔同，佢係比較“結"身，食落有d一粒粒蘑菇蓉既感覺，味道亦都比較濃郁，分量亦都唔少。飲完湯就上左沙律，兩款沙律分別係日式麻醬蟹柳沙律同牛油果大蝦沙律，沙律好鮮甜，仲配左兩隻大蝦，平時唔太食牛油果但呢個既味道令人接受到幾好食物。主菜就叫左大啡菇同埋牛柳，自己中意牛柳多d, 熟度岩岩好牛味都幾香，另外跟主菜仲跟配左焗薯，不過同我想像中有d出入，佢係連皮焗略嫌淋左d，覺得可以再焗得脆同香口d。最後跟餐仲有甜品同飲品，個甜品都幾好食。好耐無食西餐，呢餐都幾豐富同價格都合理，最緊要坐得舒服，下次有機會都會再黎食。