茶茶台式料理 (已結業)

話說有次去阿木台灣麵，等位等咗粒幾鐘，九點幾先有嘢到肚😭，餓到啲腸都打結，當時見到隔離有間都係食台灣嘢，人流唔多，不過最初唔知係黃店，所以完全冇考慮。我嘅意志都算十分堅定😌。呢間叫茶茶台式料理，第二次經過時，終於入咗去幫襯，叫咗個沙茶牛肉湯麵，下午茶時段加八蚊有嘢飲，我揀咗杯荔枝紅茶。呢度個水吧好大，自成一角，相信飲品嘅水準唔差，果然不出所料，荔枝紅茶既有荔枝清香，紅茶亦濃而不澀，好飲，加上使用環保紙飲管，呢度要加分👍。以下午茶嚟講，碗沙茶牛肉湯麵算幾大碗，椰菜，黃芽白，木耳，粟米等各種蔬菜居然佔差唔多一半份量，好誇張，蔬菜愛好者肯定鍾意😍。味道方面，可能由於湯比較多，沙茶醬味道略嫌不足，不過整體嚟講，水準算正常。小店另一特別之處，係牆上面掛滿畫作，全部都係社區老店同貓貓嘅 crossover，好有趣。關懷小動物，關注社區，關注老店，呢度又有分加👍👍。