常嚐食•深燒堂 (已結業)

天凍凍地，就好想念深圳燒烤，睇到哩間燒烤店好似幾好味，咁試試啦。店鋪唔算大，不過坐得都幾闊落。燒烤有幾十款可以揀，同埋都有唔少小食同埋主食，心思思乜都想試下。馬蹄爽，清熱下火，適合燒烤。脆皮雞中翼, 燒得啱啱好，皮燒得脆啵啵，食落好香口，裡面肉又唔會覺得好柴,仲好嫩滑。表面落咗好多孜然辣椒粉，真係同深圳口味好似。韓燒五花肉，一份好大勁抵食，五花肉少少甜味好juice，夾埋生菜一齊食勁好味。特式即制煙肉雞腸串，煙肉包埋廚師雞肉腸，一次過食咗兩款配料，唔錯。脆皮午餐肉，一份2件，表皮燒得脆啵啵，唔錯。流心芝士丸，一串有3粒，火候掌握得幾好，食落唔會覺得好幹身，搭配埋辣椒粉一齊食，好味。快燒臺灣腸原味，表皮好香口，裡面爆曬汁，臺灣腸甜甜好好味。燒越南海鮮釀蟹蓋，哩個都幾特別，食落似墨魚滑/魚滑多點，味道都好豐富。深燒花甲粉，份量好大，有花甲，金菇，豆卜同白菜。湯底係麻辣口味，紅薯粉同花甲嗦晒湯汁麻辣味，最啱冬天食啦。哩間燒烤口味真係好好味，宜家返唔到深圳，唯有揾哩間鋪頭解解饞啦！