煲仔榮記 (已結業)

男朋友一向係沙嗲牛肉麵既粉絲，知道旺角開咗煲仔榮記仲滿心期待 諗住試吓佢好出名嘅煲仔牛肉麵。一去到門口好驚訝竟然冇人排隊，點知惡夢就開始。已經唔係希望越大失望越大咁簡單，而係食完會覺得好唔抵抌晒心口。我哋叫咗招牌嘅煲仔沙嗲牛肉麵，咖喱三寶同埋流心奶黃蛋撻。碗麵未到嘅時候已經覺得好出奇 點解滾住個煲仔都可以成間舖頭冇味。個煲到咗 首先個湯唔滾 完全冇啲人講到個湯係滾到有氣泡，只係普通一個湯麵賣相唔吸引，並冇任何芽菜豆卜，只係得牛肉亂放喺個面。招牌係沙嗲牛肉，但牛肉質素好差，好鞋口，好似街市買完牛肉然後滾熟咗咁完全冇味。湯底亦都冇傳聞講到好香濃好杰，只係覺得非常普通 一碗有沙嗲味嘅湯。反而旺角其他冰室嘅沙嗲牛肉面，質素更加比佢好，但係人哋價錢比佢平成倍。另外叫咗個咖喱三寶要30蚊，更加令人失望。就好似打邊爐食到最尾，係鍋底撈起嘅豬皮魷魚同牛柏葉，熟到一啲都唔爽口，又係淋嗰個所謂好好味既沙嗲醬，但係亦都非常啖口， 同食物味道夾不到。總括嚟講，間野名大於實，俾人呃咗尼食一次都真係唔會有第二次，大家未試嘅都可以唔洗試 無謂嘥錢食啲大家樂質素嘅沙嗲牛肉麵，絕對唔建議大家食！