星期二薄餅皇 (已結業)

沙田新城市食黎食去都係嗰幾間，冇乜新鮮感？呢間位於排頭村o既小店應該可以為閣下o既味蕾帶黎一啲新刺激！小弟一向鐘情各種 pizza，由厚批到超薄批，細細件到大大件，傳統意式到新派Fusion，一律都難逃被吞噬o既命運是日又同女朋友周圍搵野食，本身諗住去IKEA，但係經過村屋就見到大大隻字寫住PIZZA，於是就雙眼發住光咁走左入去幫襯佢。舖頭係村屋地下o個層，室內只能夠坐六人，好在下午茶時間人唔多，其餘係廚房、櫃枱、飲品櫃等等。望下個menu，二人餐都不過係$110，有8 吋pizza 一個，焗意粉一客，焗飯一客及飲品兩罐，抵到喊。Pizza 點了意大利，餡料有辣肉腸、磨菇、洋蔥同豬肉，餅底鬆化，襯熱食啦喂！另外叫了白汁鴨胸意粉及龍蝦汁海鮮飯，不過不失啦。