海膽仔

營業中

休息中

睇左好多食評同youtube都有推介呢間位於新蒲崗，主打海膽嘅日式餐廳。雖然話掃街姐，但行得耐都要坐下咁嘛，所以決定嚟食個午餐😏。星期六下午1點零，唔駛等位直入。海膽三色丼 $138平時喺出面食個三色丼，價錢多數都要百尾，但呢度只係$138，價錢非常親民。每個丼都包一碗湯同沙律，湯料有豆腐、海帶、油揚，算豐富，而且唔會太鹹。三色丼包括三文魚籽、加拿大海膽、吞拿魚蓉，三款無特別出色，正常發揮，唔會有魚腥或怪味，海膽亦夠甜。性價比幾高，丼飯好大碗，即使男仔食都一定夠飽!!博多豬軟骨拉面 $68以呢個價錢預左用有鹼水味嘅拉面，可以接受。豬軟骨有兩大件，肉炆得夠軟爛，但軟骨位未夠淋、硬左D，我估再炆多半個鐘會更好。追加三文魚刺身(4切) $32三文魚厚切，正常貨。追加牛肉薯餅(2件) 32無特別，勝在夠熱夠辣口。餐廳座位幾多，有兩層；平均百零蚊已經食到個飽肚刺身丼，加上午市無加一，性價比幾高。