日本美食橫町 (已結業)

星期日lunch難得二人世界想去尖沙咀食拉麵，但又落大雨，結果喺Ocean Terminal附近周圍行，見到對面開咗間新嘅大型漫畫精品店，門口寫住2樓有日本美食橫町，所以走上去望一望。一上到去原來係新港中心嚟。嗰個美食橫町門口係一間嘢食好似cafe餐廳，入邊有幾個火車造型嘅包廂，我覺得我個仔就應該會好鍾意。入去之後係一個好大嘅food court，係星期日嘅12點幾居然冇乜人，職員多過客。入邊啲餐廳都係刺身飯、串燒、鐵板燒、拉麵同蛋糕舖咁，我就入去搵我想食拉麵。入邊有間拉麵叫i.ramen，望落價錢都叫正正常常咁。我叫咗個招牌拉麵，我老公嗌咗個撈麵。個招牌拉麵上到嚟同一蘭拉麵其實有九成相似。無論麵質同埋湯底都差唔多，但佢個湯底比一蘭更濃，連我呢個食開濃味嘅人都覺得佢濃味，佢應該真係好濃味。我第一下食嘅時候覺得佢個湯底唔夠熱，但其實佢個麵係夠熱，係個湯唔夠熱，我本人覺得拉麵湯唔夠熱係一個死症，希望呢方面可以改善吓。食咗大約三份二，我就已經覺得好飽滯，可能因為佢真係好濃味同埋佢個湯底好厚。其實座位佢係坐得幾舒適，又冇咩人，位置上又方便，係電話收得差，可能food court其他店舖會好食啲