穴蔵 (已搬遷) 新店位置

韋哥搞出個十號波，但又無情請十點落，搞到我同要返工既千萬蟻民一樣，又急又火（無車） ，一怒之下決定豪一次，約埋同事去中環穴藏食個飯，因爲我好記得之前雜誌介紹過我偶像阿蘇都讚good，憤怒口既我決定以最轟烈的方法~炸野去以毒攻毒，平衡心態。因爲剛打完風立立亂，我地居然walk-in都有位，聽講平日這是不可能的。經理個樣有D似Rock友，但就非常之nice同專業，絕對吾會係搖滾爛仔。我地一行三人，其中一個係齋姑，所以經理就好貼心介紹左個素食餐，再黎個禦膳，吾夠再補，因爲同行兩位女士都係報稱細食個堆。雖然刺身而加好普遍，但高低手始終有別，從口感至新鮮度都知道係靚貨，無欺場。我最期待當然係天婦羅，沙椎魚、蝦同蔬菜口既組合，有咬感，但不肥膩因爲粉漿吾厚。而店員介紹用海鹽或綠茶鹽代替醬汁蘿蔔茸，又真係吾錯，個口唔會濕濕立立兼太多野，清清地更加可以嗒真食材味道。因爲意猶未盡我加多個天婦羅蝦餅飯，以平復我要返工既燥底心情。個蝦餅好彈牙，放飯面可以令到飯吸收油香，鮑足。時間關係，一輪狂風掃落葉，又係時間返回現實返工去，印象good， 晚市聽講價錢好厲害，遲D儲夠彈藥再戰江湖。