Smokey Ice (已結業)

呢日去咗白布街新開嘅Smokey Ice，佢哋晌元朗起家嗰陣已經想試，上年就進駐荔枝角，近月晌旺角開店，對我嚟講就比較方便少少。地下都有幾多位，另外仲有樓上閣樓座。我哋先係叫咗呢碟好似係腸粉嚟試試，驟眼睇真係幾可亂真，佢用咗朱古力醬同士多啤梨醬偽裝豉油甜醬，士多啤梨片、菠蘿同豆腐雪糕就分別扮演豬皮蘿蔔之類嘅角色。魚蛋係吉列麻糬，咬起嚟外面脆入面煙韌。腸粉就係爽滑嘅椰汁味蒟蒻，個樣好得意，味道幾討好。除咗甜品之外，佢哋仲有幾款小食。單睇呢碟水牛城雞翼同蜜糖雞翼嘅賣相已經分唔清是真是假，其實佢哋係真雞翼嚟嘅，水牛城雞翼酸酸辣辣幾惹味，蜜糖雞翼就甜甜哋咁都唔錯。 最後仲試咗兩杯特飲，似酒嘅上層用椰子忌廉做出啤酒泡效果，下層茶味甘香。玫瑰佳人表面同樣係椰子忌廉，不過就換咗做淡淡嘅玫瑰甜味，聽返店員講佢哋遲啲會有手工啤酒，所以就特登整呢啲外表好似酒精咁嘅特飲，俾啲一大班人嚟但唔飲酒嘅人開心吓。