老點點心竹筒飯 (已結業)

收工之後同朋友突然間好想飲番杯茶，食個點心，就嚟到旺角都幾出名嘅一間點心鋪 — 老點首先叫咗個明目魚淮山燉響螺湯，因為呢排成日出去食飯應酬，少咗好多返屋企飲湯嘅日子，所以即刻叫返個湯黎養養生。唔係講笑，個湯真係好足料，一啲味精味都無！同埋都唔細盅，兩個人share都OK！另一個招牌就一定係竹筒飯，朋友叫咗個鮮蝦肉餅竹筒飯，啲蝦好大隻同埋都有成四五隻！爽口嘅蝦加上肉餅，配上竹筒入面嘅飯真係超級好食，同埋個竹筒其實一啲都唔細，如果好似我哋兩個可以一齊share食，再叫多d其他點心，唔使怕唔夠飽！再叫左珍寶鮮蝦腸同埋獅虎鮮蝦餃皇！太鍾意食蝦既我哋絕對唔會放棄任何一個有蝦食既機會！蝦餃一籠得兩隻所以如果多啲朋友食，就要叫多幾籠！蝦腸啲腸粉好滑，加埋爽口彈牙嘅鮮蝦，真係不得了！仲叫咗一個魚翅海鮮灌湯餃，灌湯餃皮不過不失，但可以再做好啲，內餡都好足料，鍾意食灌湯餃嘅朋友可以一試！以為你間鋪頭淨係食中式點心？咁你就錯啦！最後我哋叫咗兩個焦糖燉蛋，細細一個唔使怕食唔哂！脆脆嘅焦糖表面，加上滑滑嘅燉蛋，搞到食完仲想食多個！