HABO室內釣蝦場 (已結業)

之前細佬好鍾意釣蝦，佢叫我哋悶悶地可以去試吓，有得食又有得玩，咁啱見到石門呢邊有個釣蝦場，於是乎就趁happy Friday同老公過嚟玩吓 🤩呢個釣蝦場都幾大，一開始店員好好心機教我哋點樣釣，包括點樣整好 d 餌同埋將佢勾好，釣嘅時候有啲咩注意，同埋真係有蝦上釣嘅時候應該點樣用力先，先至唔會嚇走啲蝦 🙈 就咁聽就好似唔係好難，到真係落手落腳釣嘅時候就發現其實都幾考技巧，首先要好有耐性等蝦上釣，其實當中我哋有幾次都有蝦上釣，但係收桿嘅時候唔識用力，次次都嚇走咗啲蝦 😂 回到呢啲時候，店員就會好有耐性咁教返我哋應該要點樣做；正所謂自己嘅晚餐要靠自己努力，釣唔到就冇飯食 😂 喺我哋嘅努力下，總算叫做有返啲收穫 😆重點嚟啦，釣到嘅蝦可以即整即食，佢有唔同嘅煮法，預設嘅係鹽燒，亦都可以加錢試唔同味，今次我哋就試左營地醬油蝦 😋 營地醬油蝦開邊燒嘅蝦勁香甜，秘製醬油令到蝦嘅鮮味提升咗，亦都十分之香口，蝦頭仲有啲膏可以食，勁滿足 🤤秘製醬油雞翼由於佢嘅醬油實在太好食，於是乎我哋又叫咗啲醬油雞翼，呢個醬油汁鹹鹹甜甜咁，越食越好味，雞翼隻隻都脹卜卜，又唔會太油膩，唔錯 😋