英皇紅酒扒房 (已結業)

媽聽到黃秋生分享間餐廳嘅牛扒好食, 提議一家人去食。 我地中午1點30分入坐, 去到都要等位, 侍應告知牛扒同臚魚無貨, 極之失望, 社交網站亦都無寫會缺貨, 但一場黎到, 試下無妨。我地5個人點左4個餐, 分別係咖哩雞飯, 意大利飯配鵝肝, 海鮮焗飯同西冷羊排。首先到嘅係咖哩雞飯, 咖哩味唔重, 雞排有啲“鞋”, 份量少, 幸好調味適中, 唔太咸, 係一個好普通嘅咖哩雞飯。接著係意大利飯, 飯煮得好有頭,唔會太軟身, 菌味香濃, 鵝肝煎得外層脆裡面軟, 好香脂肪味, 但飯份量略為少。值得一試係羊排, 羊排煎到好淋, 肉質無渣, 脂肪比例剛剛好, 加上酸酸地嘅薄荷汁, 都算係比較好食。最後係焗海鮮飯, 海鮮份量足夠, 有兩隻蝦, 兩隻青口, 一塊龍脷柳。汁唔夠多, 將飯焗得硬邦邦, 有啲似食緊飯焦, 質素不過不失。侍應手腳好快, 快到我都未食完就收左我隻碟, 對餐牌有咩飲料唔太熟悉, 但態度還好, 起碼唔會黑面, 有問必答。 價錢方面, 如果係午餐就貴左少少, 我地5個人食左393蚊, 但已經八折左同叫4個餐, 如果唔係每人應該要100蚊。