新澳咖啡餐室 (民泰街) (已結業)

今日喺附近做嘢，所以嚟咗呢度食早餐，我哋兩個人，一個叫咗牛扒一個叫做咗豬扒，早餐的扒都算大件，我哋兩個都食煎蛋，食物味道其實都OK，不過超多油。我想唔要茄汁豆，落單嘅時候已經講咗走豆，職員話冇得走叫我自己唔好食留返佢喺度，其實我覺得咁樣好浪費，一來又要晒啲水洗多個兜，二來又浪費咗啲食物。服務方面，我哋一食完放低餐具，職員就千方百計想我哋離開，首先就叫我拎起個袋自己攬住，之後大大聲叫人坐喺我隔離先，等我哋走。其實都幾冇禮貌，我見到你人多有人排隊，我都已經快快脆脆飲埋杯嘢，咁我未夠鐘開工本來想坐一陣，都唔夠膽坐，唯有出街行。總結：有其他揀就食其他，想就腳就冇辦法，食物都唔算太差，同好就有一段距離。兩個早餐90幾蚊。