純寿司 (已結業)

一田裝修大減價，今日就同屋企人去咗睇下有咩買。行咗一陣之後覺得有啲肚餓就落咗去地下搵嘢食，本身諗住去翡翠食嘅，不過沿途經過見到呢間就試咗呢間啦。點餐嘅方法係自己寫食物代號同數量落去張紙，然後遞比店員。有啲驚訝竟然一間日本料理係咁樣嘅落單方法，不過其實都無乜所謂嘅。呢個烏冬麻麻地，烏冬唔夠煙韌，湯既味道有啲似福字麵。個鱆魚餅一啲都唔好食，完全唔覺得有章魚嘅成份。呢個迷你海鰻魚飯真係好迷你，女仔淨係食一個飯都未必夠飽，不過如果係當下午茶食都OK嘅。唔知係咪海鰻魚係咁，啲鰻魚好薄，同埋啲飯係凍既。唔知三文魚腹腩同三文魚腩有咩分別呢？不過呢個三文魚腩好似煙三文魚咁，佢一啲都唔肥美，食落唔係好好食。呢個海膽壽司算係最好食嘅嘢，雖然海膽嘅份量唔算好多，不過勝在比較新鮮，食落都幾甜嘅。呢個刺身入邊有油金魚腩、帆立貝同三文魚。我覺得帆立貝同三文魚比較好， 唔算好好食但都OK。油金魚腩我覺得有啲腥，不過同行嘅媽咪覺得唔算好腥都幾好食。呢個龍之卷比較特別，上面鋪咗塊鰻魚，中間就卷左條炸蝦。鰻魚唔算10分好食，不過比海鰻魚飯嘅鰻魚好食好多，厚好多，但係比海鰻魚多骨。下面舊壽司係幾好食嘅。軟殼蟹手卷就普普通通