金記冰室 (康怡廣場北座)

營業中

休息中

同肥B喺康怡行街，行到兩點幾，腳又倦肚又餓，就諗住求其搵間茶餐廳食個tea，估唔到咁多人排隊......等咗超過30分鐘先入得去！等位嘅途中，我哋見門口有個張貼寫住掃個QR code就可以預先點餐，我哋見咁肚餓就即刻用手機掃QR code點咗餐先，完成點餐後會出現 "請保留此號碼，入座時告知職員” 嘅字句。一入到去坐低咗，我哋即刻比個條碼職員睇，點知個職員話用條碼嘅過程比較複雜，所以要重新幫我哋再用人手落過單......(咁就唔好貼個QR code出嚟啦😓)我叫咗個招牌鮮豬潤通粉配西煎雙蛋及牛油多士，餐茶我揀咗凍檸茶。開始食第一啖通粉，覺得個湯底幾特別，佢加咗紀子，出奇地清甜（餐牌上嘅圖片係無影到紀子嘅🤔），但係食到豬潤時，覺得又薄又嚡，而且乾而無味，感覺似係之前用完嚟淆湯嘅湯渣咁，同餐牌上嘅厚切豬潤幅圖相差好遠🤔！多士比正常燶咗少少，牛油少到好似無搽咁，但還可以接受，雙蛋煎得唔夠透，亦唔夠香，中間嘅蛋清都未熟，係透明嘅......😕呢個餐嘅價錢係$59(凍飲另加$3)，整體嚟講食物質素同價錢都普普通通😯！