霸嗎拉麵 (已結業)

西九龍站的霸嗎拉麵開喺站內food court,menu亦跟返food court其他餐廳嘅format,每間餐廳一律只有4款套餐選擇。比起出面嘅分店少好多選擇。每款套餐都跟4隻炸餃子同一杯熱飲，價錢由$88至$98不等，站内員工優惠85折。開站了一段時間，到十一月頭先有機會試食，本身無試過霸嗎拉麵，所以抱著期待心情一試。food court入面有幾張屬於霸嗎拉麵嘅大枱，上面有印有霸嗎拉麵嘅日式簾，令食客感覺自己係喺拉麵店入面食緊，但因為我哋唔想同人搭枱，所以冇坐到嘅。我叫咗辛辣炙燒豚肉味玉拉麵，同事就叫咗雞叉燒雞白湯味玉拉麵。塊炙燒豚肉係厚切，一半肥一半瘦，瘦嗰邊燒到有少少太燶，變咗食落有啲乾。本身唔係話好食得辣，舊豚肉上面嘅一小坨辣醬撈咗落碗麵之後都少少辣，不過都接受到。碗麵整體嚟講都有啲鹹。隻溏心蛋個黃都唔算太流，有一部分係已經熟晒好似烚蛋黃咁，所以都有啲失望。同事都覺得整體麻麻地，又唔係難食，但唔係好食。如果唔係有員工優惠， 就真係唔係太抵。不過可以返工都近近地有得食碗拉麵，都算係咁啦。