石磨坊 (已結業)

是日為入冬以黎最凍一天，同朋友食過晚飯，但大家依凍過雪條，提議食番碗熱糖水，點知原來沿途糖水鋪已經摺晒，行行重行行，天寒地凍，要出到旺角太子先有糖水食，何其淒涼。終於黎到黑布街，在石磨坊和糖百府之間選了石磨坊，原因是朋友話見到門口ｄ雪花冰已經唔想食，哈哈，睇黎廣告牌都應該跟季節而轉。去到石磨坊果然一如所料，已經爆晒，還好剛剛有人走才有位入。但入面真係幾迫，我坐路中心，經常被人頂背脊。本來想要冬日限定椰子糊，但原來只限星期五六日，十分令人失望，只好叫一客合桃糊，另加湯丸。合桃糊頗滑，而且合桃味好香，比我那次在以合桃為店名的海記合桃坊甜品更香更甜。芝麻湯丸六蚊三粒．咬下去流沙感很滿足，但略嫌太甜，如果可以芝麻再香一點會更好。吃過熱糖水，果然暖在心頭，突如其來的冷鋒，希望快點回暖吧。