名川苑雞煲火鍋 (已結業)

天氣跌到十四五度，出街食飯一心想打邊爐。旺角食開個間已結業... 周圍行見附近有雞煲火鍋食就入座。原本想食芝士雞煲，隔離枱大大個瓦煲上好香仲幾足料。可惜朋友病左要戒雞，所以湯底揀鴛鴦鍋，一煲兩味。湯底有平有貴，當然貴既用料有返咁上下，例如田雞煲、明爐烤魚，因為工序複雜坊間比較少有既。鴛鴦鍋味道特別向職員查詢味道，平時出面指清湯+沙嗲湯，而呢間提供係麻辣+養生湯$72價錢合理。湯底材料豐富，養生湯甜甜地好滋補，麻辣湯原來較過香港人口味所以唔係好辣亦都唔麻。打邊爐點少得牛呢？想食得精揀左比較靚既本地手切牛，新鮮牛做火鍋料我都係第一次食。一碟牛價錢同分量成正比，都有二三十片，而且肉質結實色澤紅。靚肉食原味，夾一片去養生湯灼十秒熟即可以食，肉纖維細膩，牛味濃唔會有羶味呀。另外肥膏量唔多，唔會整油湯底。之後仲食左丸類芝士腸生根，不過無影相。傾計講到無聊點埋涼拌雲耳。 酸酸地好開胃，可以中和食火鍋既油膩。如果芫荽切碎同雲耳一齊醃會更入味。在場見一開門即使有位，但已有不少熟客親身來訂位預留食物，似乎愈夜愈旺場呢。