品記麵食 (已搬遷) 新店位置

同家人去完道風山觀禮,有shuttle bus落番大圍, 我地港島人,少過黎大圍搵食, 淨係識楓林小館,但係時間好似唔啱大吃大喝, 只想食d野打底,驚今晚去飲夜食飯,係火車站附近打左個圈,見到個綠色招牌好搶眼,於是決定試一試"品記麵食"。佢開係村屋樓下,舖外放左幾張枱,舖內好細,人多時一定要搭枱。我地幾個坐下即叫了"老薑湯豬潤蛋麵","蕃茄湯豬扒麵"同"爆脆豬油渣麵"。我地萬分期待個豬油渣麵,媽媽成日講佢後生時的豬油渣麵有幾香有幾脆有幾好味,聽到我地成日去搵,結果係即使出名的深水埗油渣麵都唔附合媽媽心意。估唔到無心之下竟然搵到啱佢心意嘅油渣,d豬油渣真係好脆,都幾香,不過份量幾少,媽媽唔夠喉。至於我個老薑湯豬潤麵呢,我都十分滿意,湯頭好夠薑,豬潤係新鮮豬潤,煮得剛剛好,好爽滑。阿妹個蕃茄豬扒麵,湯都幾蕃茄,食到有蕃茄蓉,炸豬扒另上,唔怕浸淋晒。我地本來想試埋煎多士同其他小食,可惜飽了,下次再黎大圍一定再試下。