影片
更多
2023-05-02
153 瀏覽
好多人都知我係個酒鬼嘻嘻！所以有酒飲嘅地方我都特別鍾意，呢日老婆大人就抵錫帶咗我去一間超有氣氛嘅居酒屋撐枱腳，飲吓酒食好嘢回味下拍拖時候嘅溫馨日子。今次去呢間係喺中環嘅須佐之男Susano-o Izakaya嗰啲名好似有啲怪怪咁！原來係嚟自一個關於酒嘅日本神話主角嘅大名，所以呢間居酒屋有好多勁有特色嘅日本清酒賣！舖頭唔係好大得12個位但係裝修幾有心思，除咗一般木裝修嘅主題之外仲用咗大鏡，令到成間餐廳嘅感覺大咗成倍好聰明嘅做法。我哋呢日就坐喺水吧下嘅二人位，啱晒我同老婆大人sweet sweet啦！嗱嗱嗱重點嚟喇！呢度嘅大廚唔做膠層走嚟開間居酒屋就係為咗理想，仲要咁鬼型仔唔怪得之老婆大人見到佢都心心眼啦！另外招呼我哋嘅仲有好cute嘅魚旦，20多歲嘅小伙子可愛到不得了，如果大家有睇藍色電視台嘅造星節目應該對佢有啲印象。好喇係時候整個小食嘆住先！呢個燒魷魚好鬼厚身人中越食越鮮甜，用嚟送酒真係冇得輸㗎。有咁正嘅魷魚梗係要飲返杯走先啦！呢枝蒲霞純米吟釀唔會好甜口用嚟配魷魚好啱Channel。跟住呢一支叫做肉万歲純米吟釀比較甜米香濃郁，一陣間要嚟配牛肉菜式就最啱key。仲有呢支老婆大人勁鍾意嘅仙
今次去呢間係喺中環嘅須佐之男Susano-o Izakaya嗰啲名好似有啲怪怪咁！原來係嚟自一個關於酒嘅日本神話主角嘅大名，所以呢間居酒屋有好多勁有特色嘅日本清酒賣！
舖頭唔係好大得12個位但係裝修幾有心思，除咗一般木裝修嘅主題之外仲用咗大鏡，令到成間餐廳嘅感覺大咗成倍好聰明嘅做法。
我哋呢日就坐喺水吧下嘅二人位，啱晒我同老婆大人sweet sweet啦！
嗱嗱嗱重點嚟喇！呢度嘅大廚唔做膠層走嚟開間居酒屋就係為咗理想，仲要咁鬼型仔唔怪得之老婆大人見到佢都心心眼啦！另外招呼我哋嘅仲有好cute嘅魚旦，20多歲嘅小伙子可愛到不得了，如果大家有睇藍色電視台嘅造星節目應該對佢有啲印象。
好喇係時候整個小食嘆住先！呢個燒魷魚好鬼厚身人中越食越鮮甜，用嚟送酒真係冇得輸㗎。
有咁正嘅魷魚梗係要飲返杯走先啦！呢枝蒲霞純米吟釀唔會好甜口用嚟配魷魚好啱Channel。
跟住呢一支叫做肉万歲純米吟釀比較甜米香濃郁，一陣間要嚟配牛肉菜式就最啱key。
仲有呢支老婆大人勁鍾意嘅仙禽初槽，話飲落去好似佢最like嘅Moscato喎！對於唔係好鍾意飲甜酒嘅我都覺得呢枝清酒好唔錯。
而家呢個時間梗係同老婆大人碰返杯，之後就開始食我哋今晚豐富嘅晚餐喇。
首先我好大膽咁叫咗呢個A5夢之和牛他他，熟悉我哋嘅朋友都知我老婆大人係食唔到有蘇味嘅牛肉！不過近幾次佢食過牛肉他他都冇問題，於是我就叫咗呢個食威士忌飼料大嘅夢之和牛比佢嘆吓。
呢個牛肉他他入面有勁多蔥花仲有芥辣，食嘅時候連埋隻雞蛋撈勻一齊就食得，牛肉好鬼鮮甜加埋啲香口嘅蔥花、芥辣仲有蛋汁嘅甜味，食完之後成個口都係香味正呀喂。
老婆大人就鍾意放喺紫蘇葉上面一齊食，佢話咁樣食仲正斗可惜我唔鍾意紫蘇葉嗰陣味。
然後我哋一人整一粒呢個松葉蟹海膽球，免頭有好新鮮嘅海膽同埋卜卜脆嘅蟹籽，入面全部都係松葉蟹忌廉做嘅餡係一啲薯仔都冇！呢舊可樂餅只能夠用鮮、鮮、鮮味嚟形容。
鮮味過後嚟一碗濃郁嘅香蔥蛋花清雞湯暖吓胃，睇落去好似一般普通嘅蛋花湯咁要飲落去先知佢咩料！佢係一碗充滿雞肉香甜味嘅蛋花湯，我老婆大人飲到一滴不留就知佢有幾好味啦。
飲緊湯嘅時候魚蛋忽然間送嚟一塊鹽板，原來係俾我哋叫咗嘅串燒用！一陣師傅會將燒好嘅串燒擺喺鹽板上面，咁就可以食到師傅燒出嚟原汁原味嘅串燒。
第一串嚟到嘅係軍雞雞翼真係唔唱番首飲歌都唔得~燒雞翼我鍾意食~，呢隻雞翼燒到個皮脆但係一啲都唔乾，入面嘅雞肉嫩溜又多汁撞鬼咁好食。
我見到餐牌上面有老婆大人最鍾意食嘅雞心梗係要嗌兩串慰勞下佢啦！呢個軍雞雞心同我平時食開嘅串燒好唔同，佢唔係外面乾硬而係成粒都好柔軟多汁但又夠乾身，超級香嘅同時仲好鬼有咬口食到老婆大人舔舔脷，睇見佢食到咁開心我都好Happy呀。
之前兩款串燒都好有質素嚟緊呢個就夠晒特別同埋刁鑽，特別到係我成世仔第一次食軍雞雞掌心嘅串燒！
大家知唔知咩係雞掌心即係雞腳中間最厚嗰嚿肉！坦白講自從我種咗牙以嚟已經好耐冇食過雞腳喇！今次師傅將個雞掌心起咗舊肉出嚟然後燒到佢又香又脆，食完簡直感動流涕多謝師父嘅堅持我先至可以重拾嘆雞腳嘅美好時光。
老婆大人已經食到飽飽咁我就自私食呢個櫻花本煙燻香辣牛舌飯，呢個牛舌厚到一個點但係就一啲都唔韌仲好有咬口添，而且牛舌嘅味超級濃好味到不得之了。
而嗰飯嘅香辣味就嚟自XO醬食落又香又辣勁惹味，啲飯仲要有飯焦究竟我係咪去咗食煲仔飯呀！
最後我哋仲叫咗件日本燒芝士年糕嚟分享，呢個年糕就特別囉頭先嗰個可樂餅就冇薯仔嘅，反為呢個年糕唔用米用咗薯仔嚟整！大廚簡直犯咗顛覆食物罪本官決定懲罰佢下次再招呼過我哋哈哈。
須佐之男 Susano-o Izakaya電話：36891031
地址：中環蘇豪伊利近街20號地舖
張貼
