鹿角巷

營業中

休息中

之前我知道哩間鹿角巷喺國內係好出名嘅，不過我真係唔知道原來香港已經開咗分店🤭，只係有一日有個朋友同我講開喺iSquare對面有一間，之前仲係勁多人排隊，所以今日行過尖沙咀就嚟試吓係咪真係咁好飲。唔知係唔係過咗熱潮，竟然冇人排隊，我諗都唔使諗就叫咗佢嘅招牌黑糖鹿丸鮮奶。等左3分鐘左右就整好左，根據佢牆上貼左一張指示，話首先大啖啜一口然後先至攪勻，於是乎我就聽佢咁嘅指示去做。嘩！第一啖真係好有驚喜，啲黑糖珍珠熱熱地，軟淋淋，再加少少鮮奶一齊啜，真係好飲到唔知點形容。之後我就跟住佢嘅指示攪勻再啜一口，佢嘅鮮奶唔會太甜，撈埋黑糖其實個甜度係啱啱好，超讚👍🏻，不過撈勻之後，個黑糖珍珠質感開始變硬，其實係煙煙韌韌嘅口感，同一開始飲嘅時候好唔同。由於佢個冰係固定左多少，所以冇得要求多冰少冰，但係我覺得佢係真係有計算過嘅，飲到最後啲冰融晒而杯鮮奶唔會好淡，最重要係飲到尾我仲可以啜埋所有珍珠，因為有好多珍珠奶茶店，因為冰太多而冇辦法將所有珍珠啜晒。