大利清湯腩 (已結業)

成兩個月無食過清湯腩，咁啱今日去開附近咪心思思行去食囉，坐低叫咗碗「坑腩米」，個黑面阿姐 (其實佢哋服務不嬲都差嘅！) 掉低張單時見佢寫咗 28 蚊，咦食開不嬲 25 蚊吖嘛，阿姐寫錯價？我望吓個餐牌，嘩…真係又加價…？最後嚟咗碗肥腩米，個黑面阿姐話無坑腩，所以同我揸主意食肥瘦腩……我一路食一路諗「唉…又加價…又受氣…」當快快食完離開後，見隔離…咦？「華姐清湯腩」無加價嘅…嬲嬲哋同「華姐」買碗「坑腩米」外賣，個湯分開上都係收我 26蚊咋！ 咁「大利」你就實在過份啦，門口玻璃貼住「阿蘇」前排响「蘇GOOD」嘅推介，你被人推介吓就招招績、得得戚？你隔離「華姐清湯腩」好食過你啦，平時見你唔使等咁耐至幫襯你啫；你就咁巴閉？介紹吓就人唔加你加？ 最過份係一加就加成三個大洋，各位評吓加得係咪過份先，加成個波蘿包價錢呀… 係你係有權加幾多都得，我都有權唔幫襯你啫，所以從今以後，就算「華姐」都加到 28 蚊我幫襯「華姐」都唔再幫襯你「大利」呀。 帶頭加價不特止仲要加咁多…你不如改名叫「暴利清湯腩」吖笨！！