豪華餅店 (已結業)

同屈機哥食完下午茶，知道附近有間出名食蛋撻既餅店，埋完單就行過對面馬路碰下運氣。去到門口，有五六個人係度排隊，個個都係叫蛋撻。心諗會吾會賣哂既情況下，照樣排隊試下。餅鋪外面玻璃牆身貼滿報紙報導同各式包餅價錢表，一目了然，方便排隊時準備埋散銀。雖則佢出名食蛋撻，但玻璃窗望入去，佢既麵包同餅都好吸引，個個都好飽滿，應該係真材實料。但岩食完tea就費事眼闊肚窄。輪到我喇，行入鋪頭，環境好窄，燈光比較昏暗，但更顯出佢既古舊同歷史。我地要左兩個曲奇皮蛋撻，同一個酥皮蛋撻俾姐姐。蛋撻涵料部份好金黃色，好軟滑，食落未感受到佢既度已經溶化係口度；曲奇餅皮望落有啲硬度，但食落即刻感受到佢既鬆脆，就好似某曲奇廣告甘話齋，金黃鬆脆又有牛油既香味。但係個餅皮有啲乾，食完想餅返啖水。加上吾係岩岩出爐，只係微溫，口感同味道梗會差啲。因為酥皮係俾姐姐，我地兩個就不予置評喇，但相信一樣甘好食。