人間有情粉麵專家 (已結業)

去太子整頭前黎先呢度食個午餐;呢間餐廳真係包羅萬有,門口有小攤位賣糖,地下食粉麵,樓上雅座係西餐廳,以我性格係鐘意更上一層樓多d。樓上地方唔太大,但都有間玻璃VIP房,入面仲有唔少藝人簽名;自己坐係玻璃窗旁,景觀雖然麻麻,頭頂係天橋,對面係馬路,但都算係開揚。呢度d餐價幾特別,有分主菜只跟湯或飲品,或者湯、飲品兩者皆有,有樣更特別:餐包要加錢至有?!羅宋湯唔太濃,個人覺得有d清添,蔬菜都ok多,最特別係湯入面加有煙肉,所以味道同一般羅宋湯係唔同;因為無加錢,所以無包食。水牛城汁雞扒意粉:雞扒煎得金黃香脆,味道唔錯,起碼無雪味;意粉較幼身但又唔係天使麵,煮得唔太淋,收貨!水牛城汁味道食落都真係算辣,個人覺得好似用茄汁加泰式雞醬混合,味道都過得去,但汁既份量太少,只夠雞扒用,可以多少少就更好;配菜係水煮青瓜、甘筍,味道清淡夠晒健康。凍檸蜜罕有地唔再需要額外加錢,而且又夠大杯!蜜糖份量好夠,飲到西洋菜蜜味道,抵飲!服務方面算唔錯,有位上年紀先生好有禮貌,每個客人離開都會溫馨提示: 小心樓梯!!呢度有樣最好係免加一免小費,的確可以為客人慳唔少,真的"人間有情"!