釜之魂釜飯專門店 (淘大商場) (已結業)

如果黃店都有最佳進步獎，我會頒畀淘大嘅釜之魂釜飯專門店。呢間以食鰻魚飯出名，但係由於我唔好鰻魚，所以雖然開咗有一段時間，我都甚少幫襯。直到舊年十一月，我終於試咗佢哋嘅泡菜牛肉釜飯，質素係中下：餸唔夠味，飯太爛，牛肉仲有一朕雪藏味，總之就絕對唔稱得上好食。今年四月，畀多次機會佢，試咗鯖魚泡菜煮配釜飯，估唔到略有驚喜：鯖魚浸喺泡菜湯中以為會好腥，但食落居然一腥味都冇，肉質亦算嫩滑，唯一係比較多魚骨，食嘅時候要小心。而成個定食最出色嘅肯定係個釜飯，飯粒飽滿，粒粒彈牙，仲有陣陣飯嘅香氣，非常好食。