斗‘泰國美食 (已搬遷) 新店位置

難得近排返工唔駛帶飯，一於發掘下公司附近既外賣店，就揾到呢間。只係食過幾次，最推介最回味係冬蔭公蝦湯粉($59).冬蔭公當然個湯最重要，佢個湯原來係比較酸，好重蕃茄同青檸香味，外賣時佢會跟一包乾辣椒碎，一包魚露，唔落辣椒就完全唔辣，而落左魚露，味道就變番平時既冬蔭公，冇咁酸同更加鮮甜，我就兩樣落晒既。湯既份量都夠既，啲米粉吸滿湯後仲飲到好多啖～米粉既份量就少左啲，好彩佢仲有好多配料，有食極都有既雞脾菇，仲有3大隻蝦，都爽口同鮮味既，好滿足。加$5有龍眼水/香芧水，兩款都好清甜，唔係落好多糖嗰種假既甜。有試過泰式雞肉炒河粉，佢話用泰國醬油同日本醬油撈埋一齊炒，係好香既，啲蛋絲都好好味，不過我鍾意好粗有咬口既河粉，佢呢款就比較碎，食得唔夠過癮。下次再試下其他款式啦。要特別提下佢既價錢，同款食物隔離左右既餐廳要接近$80，佢只係$60咋，但係一樣咁好食，真係好抵。