太湖海鮮城 (已結業)

相信大部份朋友對太湖海鮮城呢個名字一啲都唔陌生。太湖可以話係老牌酒家中嘅表表者。午飯時間有點心，夜晚有小菜丶海鮮。的確係同家人聚餐或者做節嘅好地方。但係大家有冇諗過午飯時間同幾個飯腳一齊去太湖食佢嘅小菜海鮮呢？呢一篇食評我主要係想推介一味上湯龍蝦煎米底俾大家。何謂煎米？就係將米粉壓成一餅，底面煎至乾身丶香囗。試諗諗喺脆卜卜嘅煎米上面再淋上上湯龍蝦。龍蝦係波士頓龍蝦。龍蝦肉非常彈牙，上湯汁稀結適中，味道恰到好處又唔會搶咗龍蝦嘅鮮味。煎米非常香口，再點埋呢個上湯汁…真係無敵嘅組合啊當然如果你多人一齊食嘅話可以叫多過一隻龍蝦，又或者加啲錢轉做大隻啲嘅加拿大龍蝦。我同三位飯腳點咗一碟上湯龍蝦煎米底（加底），一碟燒味拼盤，一個菜，埋單大約百三蚊一個人。工作日嘅午餐嚟講唔算平，咪當平時做嘢咁辛苦，間唔中慰勞下自己囉。