MOS Burger Express (德福廣場2期)

營業中

休息中

自從德福開咗呢個food court之後，我間中都會嚟幫襯吓，今日就順應阿仔嘅要求揀咗食MOS Burger。呢度嘅漢堡套餐相對地貴啲啲，但又好食多啲啲，所以我都鍾意嚟食。落單之後兩個餐話咁快就到手。特級和牛漢堡嘅牛肉漢堡真係零瀉juicy，而且我鍾意佢有原塊生菜，夾埋芝士蕃茄一齊食真係正！摩斯芝士漢堡除咗有蕃茄芝士做配菜之外仲有洋蔥粒，牛肉漢堡就唔使講一定係好食，阿仔食得好開心。厚切薯條嘅口感真係好好多，而且佢炸得比較乾身，每一條又夠挺身，所以覺得特別好食。北海道南瓜薯餅因為有南瓜，所以食落特別香甜，外面炸得夠脆，小朋友更加鍾意食。MOS Burger嘅粟米湯係我嘅至愛，熱辣辣嘅粟米湯再加上香、甜、滑嘅口感，令我好多年前已經愛上呢個湯，所以我每次都會將套餐嘅飲品轉成粟米湯。凍奶茶嘅奶同茶比例適中，而且我仲鍾意佢嘅少甜效果。原來呢間MOS Burger仲有早餐供應，希望有機會啱時間的話可以過嚟幫襯埋佢嘅早餐啦！特別值得一題嘅就係呢間MOS Burger為處於德福嘅美食廣場，現場仲有自動洗手機，喺呢個疫情期間嚟呢個環境好又衛生嘅food court，真係食得開心又放心。