松藝館 (已結業)

喺講食嘢之前，先不得不提一入門口嗰個無敵大海景， 我哋夜晚嚟到一坐落去全玻璃遙望 尖沙咀碼頭對出夜晚嘅海景，真係冇得輸！！好 講返嘢食。 我叫咗個4 course嘅晚餐，加咗一份松露pizza，一份超級好食嘅cream sauce配焗薯，同埋一份甜品。晚餐套餐先來一份鮮甜醒胃配上新鮮松露嘅帶子，分4件方便share。 帶子食酪鮮甜並唔係一般嘅冰鮮貨色亦沒有任何雪味，配上少許松露增加味蕾刺激。主菜係安格斯牛配上新鮮黑松露， 牛扒我叫左5成熟。 牛扒處理得十分妥當，用松露油先煎香兩邊，火喉控制好，不失肉汁。而本身肉質亦都十分軟淋肉味濃 ，十分之美味。 牛扒上嘅松露味不算突出唔會蓋過牛扒本身嘅肉味。闊條麵配上侍應係上臺後即刻磨嘅黑松露，黑松露嘅香味由闊條麵熱淋淋嘅熱汁一齊帶出黎，真係好香！！！跟餐既墨汁意大利飯亦相當有驚喜！！ 意大利飯飯則煮到軟硬適中較有咬口，濃濃嘅湯汁亦都煮哂入曬啲飯粒裏面。最有驚喜嘅係焗薯仔，面頭勁多芝士，咬落啲薯仔外面脆入面軟，正！最後嘅甜品都係創意滿分，佢嘅擺盤就係模仿黑松露喺泥土生長嘅環境，所以係黑色粉包住嘅芝士蛋糕，旁邊嗰兩舊“蘑菇”係用糖霜造嘅，好特別！