立鮨 (安富大廈) (已結業)

近來喺荃灣做嘢，發現呢度都開咗間立食壽司，係立鮨！以前想食立鮨要出到去尖沙咀旺角，而家去荃灣都有得食，實在太好。荃灣呢間店幾闊落，好新淨。入到去，係電子點餐，非常方便。由於太耐冇食壽司，所以我哋叫晒我哋最鍾意食嘅海鮮！首先我哋叫咗蔥吞拿魚蓉軍艦，吞拿魚蓉非常鮮甜，紫菜夠脆，成個食起嚟口感非常好。 然之後我哋就食辣味三文魚軍艦，呢個調味好出色，辣味唔會辣得滯，啱啱好有好夠香，非常好味嘅調味！近年越嚟越鍾意食油甘魚，黎到梗係要食新鮮嘅油甘魚啦！呢度嘅油甘魚仲要加咗啲柚子醬嘅調味，酸酸甜甜更加帶出油甘魚嘅鮮味，好好味。見到呢度都有蟹肉蟹膏軍艦，即刻叫咗嚟食。呢度嘅蟹膏份量唔算好多但係味道非常濃郁，呢個份量已經足以令到全個口都係超級香嘅蟹膏味！最重點就係叫咗個日本馬糞海膽軍艦，因為日本嘅海膽味道真係超級好，絕對唔係其他地方嘅海膽可以比得上。日本馬糞海膽入口即溶，海膽非常鮮甜，簡直係去咗日本嘅感覺！每一件壽司都係非常好味非常新鮮，超級滿足嘅一餐。