糖百府 (已結業)

同女朋友周年紀念，去左西貢浪漫下，食完飯見到碼頭小巴站有間糖百府，女朋友話想食糖水，成日食西貢出哂名既X記，都想試下新野，咪入去試下。舖位細細，但記得可以坐到30人左右，仲有一個半開放式既廚房，坐近廚房的話，可以見到佢地做緊乜。員工有D有著印有店舖嘜頭既圍裙，有D無，都唔係好知邊個係員工邊個唔係，不過，眼見都好有禮貌，招呼好好。牆上有寫住是日沽清了什麼，起碼唔駛估乜野有得食，乜野無得食。餐牌有相有字，於是又唔駛估嗰D係乜野嚟。普通既糖水例如紅豆沙、綠豆沙、芝麻糊、喳咋都有，燉野又有，起碼照顧到不同既需求。最後，因為心大心細，咪問邊個係店長，等佢介紹。就係咁，女朋友揀左心太軟配雲呢拿雪糕，我就揀左芝麻糊。因為心太軟係熱既同埋應該都幾甜，呢度配雪糕食都幾夾，雪糕係用Drey字頭既雲呢拿味，無其它味道，都OK因為配埋朱古力味既心太軟，唔會變得咁膩! 一個人既份量啱哂女仔食，食完都幾滿足架! 店長話芝麻糊係自家磨製，食落又真係覺得超滑，肯定唔係開水沖，真係唔錯。應該會再同女朋友去試埋其它野食!