小天使餐廳 (已結業)

自從肥髀上次來過之後，成日想來食，今日都無訂位，就膽粗粗來試下，咁好彩有位，環境清靜，裝修都有用過心思，歐洲嘅小店感覺，侍應伯伯好好禮貌，雖然年紀大，但斟水收碟都好勤快！而且有人情味，我叫咗兩個午餐，肥髀就散叫一個意粉！但上湯時伯伯自動比多一個空碗同一份麵包，比我們分啲湯比肥髀飲，窩心 午餐餐湯係南瓜忌廉湯，湯好濃，好滑，南瓜味重，但滑之中仲有少少南瓜茸，配埋跟湯嘅麵包，麵包鬆軟，有啲提子碎響裡面，撕開沾湯吃，好味！前菜有焗鴛鴦薯皮，配沙律，鴛鴦薯也即係一塊係吞拿魚茸，魚茸配薯皮味道唔錯，係感覺膩啲，另一款係煙肉碎，煙肉碎炸得脆口，配薯皮剛好！沙律菜以紅生菜同火箭菜為主，幾種菜帶少少苦味，配黑醋汁幾好味，不過肥髀唔肯食，只係食車厘茄！我叫黑松露醬薄餅，薄餅係薄批，焗得香脆，芝士唔多，但幾香，仲可以拉出少少芝士絲，上面鋪滿雜菇，雜菇煙韌，黑松露醬無乜香味，味道偏淡，但我覺得整體夾埋好味！侍應伯伯自動比芝士粉，再問我要不要辣椒仔辣汁！魚佬叫海鮮龍蝦汁意大利飯，我試咗啲飯，偏硬（我知道意大利飯會比平時嘅飯硬，但今次真係好有咬口）龍蝦味道不重，味道一般！肥髀個意粉我無食！餐飲熱檸茶正常！值得